tula ng pag_ibig

PAG-IBIG: isang bahaghari

ni Marvin Ric Mendoza

 

Kung ang pag-ibig ta’y isang bahaghari,

ako ang maputing ulap na napili;

ang araw ay ikaw na siyang may-ari

ng mayamang kulay na bumibighani

 

Mapugto man ito kung saka-sakali

at luhang manlaglag sa dakong tanghali.

Pagtatakipsilim, o mutya kong tangi,

muling magdurugtong ang napugtong tali.

Advertisements

TULA NG PAG_IBIG

PAG-IBIG!     PAG-IBIG!

ni Marvin Ric Mendoza

 

Pag-ibig…paanong malilimot kita?

Ikaw ay gunitang pagkaganda-ganda;

kung ipinid ko man ang luhaang mata,

sa mahapding puso’y pipitlag-pitlag ka!

 

Bagwis ka ng isang gunitang matamis,

papaga-pagaspas sa pinto ng dibdib;

hihimig-himig ka at kinakalabit

ang bagting ng pusong ibig nang mapatid!

 

Nang mapatamis ka’y ininom kong lahat

sa saro ng buhay ang lamang kamandag;

walang kailangang puso ko’y mawasak

sapagkat sa luha’y lalo kang didilag!

 

ibulong mo sa hangin mahal!

Ibulong mo sa hangin o aking mahal
ang yong sinasamo sa ating maykapal
saka kung matupad ay iyong itanghal
at pasalamatan ang kaylaking tagumpay.

Sa iyong pagbulong tiyakin mo lamang
kung saan patungo ang hanging hahagkan
sapagkat kung hindi, may pagsisisihan
ang ‘yong pusong maliligaw na tuluyan.

Ibulong mo sa hangi’t ulit-ulitin
ang ‘yong kahilingang ninanais kamtin
saka kung matupad at iyong maangkin
pag-ibig ko naman ang iyong hilingin.

ANG PAG-IBIG

tula para sa buwan ng mga PUSO


 


ANG PAG-IBIG


Ang pag-ibig ay brilyanteng sa kislap ng araw kumikinang
na  ang uri ay sa kintab na iyong matatanaw.
Brilyanteng mula sa lupa nang iyong masulyapan
ay tila nagsasabing ika’y mapalad na nilalang.

Ang pag-ibig ay para ring salapi na hinahanap-hanap,
kapag natagpuan na’y pustura na’t nakagayak;
Bagaman kung ang nakatagpo’y hindi maingat
ay maaring mawala at di na muling mahahanap.

Ang pag-ibig ay kulay man din sa bahaghari
na ang kahulugan ay hindi mawari.
Pitong kulay na iba-iba bagaman isa ang tinatangi
ang natirang anim kung mapahiya’y ngingiti.

Ang pag-ibig ay bulaklak sa parang at bukid
na pinipitas ng sinumang makaibig.
Ito’y mga talulot na pumapahid
sa hinagpis puso at damdaming nasasaid.

Ang pag-ibig ay bato na sa daa’y nakakalat
na minsa’y pinupulot ng dalagang lumiliyag.
Ang batong ito ‘pag ipinukol mo’t sukat
kung hindi makabukol ay makasusugat.

Ang pag-ibig ay para rin namang tubig
na umaagos pagkat kanyang ibig.
Ang tubig na ito na minsa’y nagkukulay putik
ay naiinom din ng uhaw na tagabukid.

Ang pag-ibig ay parang buto ng Papaya
na kulay itim at sa paningi’y di maganda
ngunit pag itinanim at tumubo na
ang butong pangit ay magiging hinog na bunga.

Ang pag-ibig ay para ring Facebook ika ko
na may mga marunong at may naloloko.
Ang pag-ibig na kung hindi nalog-out at pinabayaan mo
kung mahahack ay tangis lang ang sa iyo.

Tunay nga namang ang pag-ibig ay makapangyarihan
pagkat kayang supilin kahit ang kaaway.
subalit pag-iingat lamang ang ating kailangan
nang ang pagibig nati’y hindi maging mitsa ng kamatayan!